OPD Time: 8:00 AM - 5:00 PM
कागेश्वरी मनोहरा नगर अस्पतालको आँगनमा आज एउटा सुखद र ऐतिहासिक अवसरको उदय भएको छ। बागमती प्रदेश सरकारका माननीय मुख्यमन्त्री श्री इन्द्रबहादुर बानियाँज्यू, आर्थिक मामिला तथा योजना मन्त्री माननीय प्रभात तामाङज्यू र खानेपानी मन्त्री (कार्यवाहक) माननीय कृष्ण लामाज्यूको गरिमामय उपस्थितिमा सम्पन्न उच्चस्तरीय अवलोकन तथा सुपरिवेक्षण कार्यक्रमले अस्पताल परिवारमा एउटा नवीन ऊर्जा र उत्साहको सञ्चार गरेको छ। राज्यको उच्च नेतृत्वको यो पदचापले सेवामा समर्पित हातहरूलाई थप हौसला मात्र दिएको छैन, बरु आम नगरबासीको स्वास्थ्य सेवाप्रतिको भरोसालाई अझ प्रगाढ बनाएको छ। निरीक्षणका क्रममा माननीयज्यूहरूले अस्पतालका विभिन्न विभागहरूक अवलोकन गर्दै त्यहाँ उपलब्ध सेवाको गुणस्तर, प्रयोगशालाको सुदृढ अवस्था र चुस्त व्यवस्थापनको मुक्तकण्ठले प्रशंसा गर्नुभयो। स्वास्थ्य बीमाका कारण नागरिकहरूले पाएको उपचारको सहज पहुँच र अस्पतालको सेवाबाट सेवाग्राहीमा देखिएको सन्तुष्टिले नेतृत्वलाई समेत प्रभावित तुल्याएको थियो। अस्पतालको वर्तमान अवस्था मात्र होइन, यसको भविष्यको सुन्दर Master Plan प्रति विशेष चासो राख्दै माननीय मुख्यमन्त्रीज्यूले विकासको पथमा सरकारको तर्फबाट पूर्ण सहयोग र प्रतिबद्धता व्यक्त गर्नुभयो, जुन हाम्रो लागि गौरवको विषय हो। कार्यक्रममा नगर प्रमुख, उप-प्रमुख तथा अस्पताल व्यवस्थापन समितिका पदाधिकारीहरूले अस्पतालको विगतदेखि वर्तमानसम्मको संघर्षपूर्ण तर सफल यात्राको स्मरण गर्दै नागरिकको जीवनमा आएको सकारात्मक परिवर्तनको चर्चा गर्नुभयो। कार्यकारी निर्देशक र मेडिकल सुपरिटेन्डेन्टज्यूको स्पष्ट मार्गचित्र र प्रस्तुतीकरणले अस्पतालको आगामी गन्तव्यलाई अझ प्रष्ट पारेको थियो। केवल औपचारिक निरीक्षणमा मात्र सीमित नरही माननीयज्यूहरूले स्वयं अस्पतालको सेवा अनुभव गरी देखाउनुभएको अपनत्वले यो भ्रमणलाई अझ स्मरणीय बनाएको छ। प्रदेश सरकारको यो अभिभावकत्वले कागेश्वरी मनोहरा नगर अस्पताललाई एउटा नमूना स्वास्थ्य संस्थाका रूपमा स्थापित गर्न थप प्रेरणा र शक्ति प्रदान गरेको छ।कार्यक्रमको अन्त्यमा, नगर प्रमुख तथा नगर उप-प्रमुखज्यूले अस्पतालको वर्तमान आवश्यकता र भविष्यको अनिवार्यताबारे नेतृत्वको ध्यानाकर्षण गराउनुभयो। विशेष गरी अस्पतालमा शल्यक्रिया कक्ष (OT) को आवश्यकता रहेको र अस्पताल १०० शय्यामा स्तरोन्नति भइसके तापनि सोही अनुरूपको पूर्वाधार तथा आधुनिक उपकरणहरूको अभाव रहेको पक्षलाई उहाँहरूले प्रष्ट पार्नुभयो। सेवालाई थप प्रभावकारी र सुलभ बनाउन यी भौतिक तथा प्राविधिक आवश्यकताहरू पूरा गर्न प्रदेश सरकारबाट विशेष सहयोगको अपेक्षा राख्दै उहाँहरूले विनम्र अनुरोध समेत गर्नुभयो। नगर नेतृत्वको यो तार्किक माग र नागरिकप्रतिको उत्तरदायित्वलाई मनन गर्दै प्रदेश सरकारले यसको उचित सम्बोधन गर्नेमा अस्पताल परिवार विश्वस्त रहेको छ।
